先达人

标题: 工作生活皆不顺香港青年最缺梦 [打印本页]

作者: zjj 时间: 2017-10-1 23:13
标题: 工作生活皆不顺香港青年最缺梦
      工作生活皆不顺　香港青年最缺梦
                        东网新闻与时评  10月01日(日)

   学周星驰话斋，做人冇梦想，同条咸鱼有咩分别？冇错，做人唔止要有梦想，仲要有行动去圆梦，尤其系年轻人，更加应该对前途充满希望。可惜吖，香港唔少后生仔对前景悲观，冇梦想又冇行动，真系灰到爆㗎。
   一项由香港、上海、台湾及新加坡四地合作嘅调查显示，香港年轻人喺四地之中最缺乏梦想及圆梦动力，对未来经济发展感到乐观嘅净系得一成咁大把；至于未来可否成功翻身嘅信心咯喎，更系敬陪末席。另外，多达七成一香港年轻人最担心未来楼价过高；其次系忧虑未能学以致用及人工低于预期，一句到尾，即系钱作怪。反观上海及新加坡年轻人对前景最乐观，台湾年轻人则最有梦想。

   香港后生仔一谂起置业问题就头痛，唔系无缘无故㗎，呢，香港楼价连升十七个月，又创新高嘞，但人工加得鸡碎咁多，点追吖。话时话，置业烦恼唔系香港独有，另外三地嘅后生仔都有呢方面嘅压力，不过心态就好唔同嘞，人哋充满朝气，对前途充满希望，好似上海吖，经济发展蓬勃，跨国企业纷纷进驻，年轻人有机会向上流动，凭努力可以改变命运，心情梗系靓啲；又好似新加坡，创新科技领先全亚洲，年轻人出路增加，点似得香港来来去去就系金融及地产两味咁单调喎。
冇计喇，香港最大问题就系经济发展欠缺新动力，年轻人出路狭窄，睇吓每年嘅文凭试状元一窝蜂争读医科咪知啰，做唔成专业人士咯喎，又冇本事炒楼炒股咯喎，想向上流动简直难过登天，你话后生仔有乜法子唔悲观吖。试谂吓，香港百物腾贵，就算有梦想创业都唔容易，净系租金已经吓死人，难为特首林郑月娥轻描淡写，话青年问题全世界都系一样喎，弊在人哋有机会改变，有梦想可追，香港冇呢。

讲到呢度，又谂起城中某富二代指摘年轻人一年去几次日本旅行，所以买唔起楼，呢啲咪系典型嘅倒果为因啰。正所谓，有头发边个想做瘌痢，如果去少几次旅行真系买到楼，肯定冇人去旅行都似，但现实系买一个豆腐膶咁细嘅单位，都要唔饮唔食十八年先至达成，年轻人心灰意冷，今朝有酒今朝醉就系咁解。
今时唔同往日嘞，以前狮子山下嘅香港，连穿胶花嘅基层都有机会发达，家阵早就冇咗呢支歌仔唱，反而港人过去最睇唔起嘅内地就事事超前，愈做愈起，再次应验风水轮流转嘅道理。港府话就话协助年轻人置业，仲吹到天花龙凤添，但如果经济结构继续死估估，向上流动阶梯继续阻塞，都系治标唔治本嘅咋。
   （泉水编辑）

欢迎光临先达人 (http://siantarpeople.org/)