日志
放生民航大花筒 官官相护太丑陋
放生民航大花筒 官官相护太丑陋
02月04日(六)
02月04日(六)
古人话斋︰国家之败，由官邪也。香港乌烟瘴气，七国咁乱，讲到底都系港府其身不正、官官相护搞成，民航处大花筒丑闻随时不了了之，咪就系典型例子咯！
呢，本报近年多番踢爆前民航处处长罗崇文主责嘅新总部大楼项目，极尽大花筒之能事，大楼内“大浴场”、“跳舞场”同“电视城”等豪华设备，分分钟媲美古罗马王宫，丑闻轰动全城。运输及房屋局调查结果日前出炉，证实一名相信系罗崇文嘅高级首长级官员“行为不当”，已经按公务员程序采取简易纪律行动，即系口头或者书面警告了事；至于另一名同样喺事件中有不当行为嘅首长级人员，因为已经退休，公务员纪律机制冇佢符，净系可以将不当行为正式记录喺人事档案。
唔系啩，罗崇文丑闻多多，除咗多次被审计署炮轰，更被立法会帐委会以最严厉嘅字眼“痛斥”，甚至佢老哥退休，港府连赞扬佢“贡献”嘅例行公事都悭番，点可以一句“不当行为”就轻描淡写带过？仲有吖，“搣长粮”系“纪律行动”，“面斥不雅”又系“纪律行动”，当局对罗崇文高高举起，轻轻放下，即系包庇啫，佢老哥咁都可以全身而退，除咗一炮过千二万退休金，仲每月稳袋超过七万元可以咬过世嘅长粮，仲有天理嘅？
话时话，罗崇文任内臭史厚过本电话簿，绝对唔止大花筒咁简单，特别系经佢手采购嘅新空管系统，大拿拿十几亿元买着个烂灯盏，表现仲衰过旧系统，早就有立法会议员质疑成单嘢涉及以权谋私同利益输送，唔排除向廉署举报。家阵冇嘢怕，最怕廉署一阵又话惊有人“唔合作”耍手拧头咋。
罗崇文劣迹斑斑都可以安全着陆已经够离谱，另一名民航高官因退休获放生，更加系荒天下之大谬。错就系错，冇可能退休后当粉笔字抹咗就算，中国古代对付贪官，死咗都要开棺戮尸甚至挫骨扬灰，现代冇咁残忍，起码都要接受应有嘅惩罚，前政务司司长许仕仁就系人办，公务员退休成为免责挡箭牌，点都讲唔通！
咁点解呢单臭史不了了之？有人猜测民航处老顶、运房局局长张炳良已经执紧包袱走人，索性卖个顺水人情，官官相护“大赦部下”。咁又系呀，张局长管边瓣衰边瓣，自己退休后都惊住畀人追杀，咪做人留一线，日后好相见咯。
计功夫茶话斋，一众特首参选人与其吹嘘治港大计吹到天花龙凤，不如脚踏实地由基本做起，执番正公务员纪律好过喇！
(本文用广东方言写成,不懂粤语者读了,恐怕难于理解,请谅)
